Prezdente PN husu Servidor Estadu Uza Uniforme Tais

Wptimmaster 05:08:00 OTL Divertimentu

DILI—Prezidente Parlamentu Nasionál, Aderito Hugo da Costa, informa, ho estabilidade kondusivu fó oportunidade ba hamosu kreatividade indústria sira produs tais Timór ba roupa modelu iha nasaun RDTL, no ida ne’e sei kontribui makas ba ekonomia nasaun nian rasik.

Tuir nia, sé iha indústria sira hanesan ne’e, bele dezenvolve ho kuantidade ida ne’ebé maka barak, di’ak tebes, hodi kontribui ba sustentabilidade ekonomia iha país ne’e.

Prezidente PN Ne’e hatutan katak, Komisaun Funsaun Públiku (KFP) lansa ona programa ida ho Governu, no Konsellu Ministru prova ona nune’e servidór Estadu sira tenke uza uniforme roupa ho modelu tais ba hala’o servisu.

“Ha’u hein KFP, sei koopera ho kompaña Raya Tex inklui kompaña seluk tan mós bele, nune’e produs tais ho modelu roupa ba servidór Estadu sira uza ba fatin servisu, importante depende ba modelu roupa ho tais ne’ebé institusaun Governu sira nia hakarak,”hatete Prezidente PN, Adérito Hugo da Costa ba jornalista sira hafoin asiste lansamentu tais ho modelu roupa hosi kompaña Raya Tex iha Sentru Konvensaun Dili, Sábadu (10/12).

Hodi dehan, hosi KFP dezeña ona programa ida atu posibilidade iha uniforme ba Funsaun Públiku atu bele uza roupa ho tais semana ida dala ida ka dala rua.

“Ha’u rona Komisaun Funsaun Públiku halo regulamentu rasik, ita hein nia implementasaun,”katak Prezidente PN ne’e.

Entertantu karik funsionáriu PN rasik mós sei utiliza uniforme ho modelu tais, Prezidente PN ne’e esplika katak, durante ne’e iha, maibé Parlamentu sei haree tan format ida, ne’ebé idéntiku ho uniforme funsionáriu nian, no Ministeriu ida-idak mós bele haree nia motivu ket-ketak, mai ho roupa modelu tais, nune’e bainhira uza ba atividade servisu labele hanesan.

Diretór kompaña Raya Tex, Raul dos Reis Lemos, hato’o agradese ba Governu Timor-Leste, liliu apoiu hodi halo lansamentu ba roupa ho modelu tais ne’ebé maka sei fa’an ba públiku.

Raul hatete, produtu tais nu’udar orijin hosi Timor-Leste, ne’ebé maka durante ne’e sai hanesan valór kultura ne’ebé maka bo’ot tebes iha sosiedade nia le’et (Fetosaa no Uma Mane).

Maibé, tuir Raul dehan, tanba mudansa teknologia iha era globalizasaun, iha mundu tomak adoptasaun hodi transforma produtu sira ne’e maka durante ne’e komunidade sira uza hanesan kultura transforma mós ba iha merkadu sira iha railaran no railiur.

Nune’e nia hakarak atu transforma fali produtu tais Timór ba iha testil (hena) no bele suku ba roupa ho modelu oi-oin, tantu ba feto no mane sira.

Raul salienta, kompaña Raya Tex hamosu hanoin ida hodi transforma produtu tais ba iha testil tanba oras ne’e dadaun iha mundu mosu evolusaun teknologia hodi hamosu nasaun ida-idak nia produtu.

“Liuhosi lansamentu refere ha’u espera bele fó hanoin ba Timoroan sira hotu katak iha Timor-Leste iha ona hena ho modelu tais bele uza hodi suku ba roupa ho modelu oin-oin. Maske nune’e ha’u agradese ba apoiu Governu hodi ami realiza lansamentu ofisiál produtu tais ho modelu roupa ba públiku,” dehan Raul Lemos iha nia diskursu.

Planu hakarak transforma tais ba roupa, tuir Raul dehan, tanba mudasa teknolojia iha era globalizasaun, mundu tomak adopta no transforma produtu orijinál sira ne’ebé durante ne’e sosidade uza hanesan kultura.

“Ita halo ida ne’e la’ós signifika atu hamate ita nia grupu kreatividade sira ne’ebé maka durante ne’e soru tais. Kompaña Raya Tex hamosu hanoin ida hodi transforma produtu tais ba iha testil haree oras ne’e dadaun iha mundu mosu evolusaun teknologia hodi hamosu nasaun ida-idak nia produtu orijinál ba uniforme iha nasaun rasik,”tenik tan.

Iha oportunidade hanesan, Ministru Turismu, Arte no Kultura (MTAK), Francisco Kalbuady Lay, apresia tebes ho inisitva kompañia Raya Tex nian ne’ebé hala’o investimentu iha produtu tais ba roupa, no hein katak ba futuru Komisaun Funsaun Públiku sei halo regulementu ida, anunsia ba servidór Estadu sira hotu bele uza farda servisu ho produtu tais Timór.(max)

 

Similar Post You May Like

Recent Post

Banner

Online Hits

  • Online: 9 / 516 Hits: 3821 / 714953
  •