Feto Na’in 20 Eleita ba Xefe Suku

Wptimmaster 18:02:34 OTL Distritu

DILI— Rejultadu final eleisaun xefe suku iha segunda volta iha territóriu timor laran hatudu, feto hamutuk na’in 20 maka eleita ba xefe suku, no mane hamutuk 422, hosi total suku 442.  

Munisípiu ne’ebé mak feto la manan iha eleisaun maka, Munisípiu Ermera, suku 52, Bobonaro, suku 50, Lautem, suku 34, no Rejiaun Autonomia Oe-cusse, suku 18.

Rejultadu ne’e fó sai hosi Diretór Nasional Apoiu Administrasaun Suku (DNAAS), Amándio Paulino Gastão Sousa, liuhosi konferénsia ba imprensa iha edefísiu Ministériu Administrasaun Estatal, Dili, Segunda (14/11).

Hosi rejultadu ne’e, Diretór Amándio haktuir, munisípiu ne’ebé feto mos manan eleisaun maka, Munisípiu Aileu feto na’in haat no mane na’in 27 hosi total suku 31. Munisípiu Ainaro feto ida, mane na’in 20, hosi total suku 21.

Munisípiu Baucau, feto nain lima, mane nain 54, hosi total suku 59. Munisípiu Kovalima feto ida, mane nain 29 hosi total suku 30.

Munisípiu Dili feto tolu, mane nain 28 hosi total suku 31.Munisípiu Likisá, feto ida, mane 22 hosi total suku 23.

Munisípiu Manatuto, feto rua, mane 27 hosi suku 29. Munisípiu Manufahi, feto rua, mane 27 hosi suku 29. Munisípiu Vikeke, feto ida, mane 34 hosi total suku 35.

Entretantu tuir matadalan, hafoin rona rejultadu eleisaun final, xefe suku eleitu konvoka sorumutu dahuluk ho konsellu suku eleitu.

Tuir mai konsellu suku sei hili lia nain tuir kustumi no tradisaun suku nian.

Hafoin ne’e, konsellu suku mos sei hili reprejentante juventude feto no mane. Prosesu ne’e liuhosi votasaun iha konsellu suku hafoin simu aprejentasaun kandidatura joventude feto no mane.

Tuir Amandio Paulino hatete, prosesu eleisaun orgaun suku ne’e prosesu estadu nian tanba ne’e laiha ema ida atu halo impedementu, prosesu la’o nafatin, karik ema ruma la satisfas bele hato’o keixa liuhosi Tribunál.

Iha prosesu eleisaun durante primeiru ronde no segundu ronde, nia rasik rekoñese katak iha duni problema balun maibé nia konsidera problemane’e ki’ik, tanba sira la rejista probelema boot durante prosesu eleisaun ne’e, maske iha duni mais konsege rezolvidu basa ida dalan liuhosi Tribunál mak bele halo desizaun.

Nia hatutan, karik iha xefe suku eleitu balun ne’ebé deskunfia komete krime ruma, mais kuandu seidauk iha desizaun hosi Tribunál, sira sei konsidera nafatin hanesan legál tanba ne’e sei laiha impedementu ba prosesu posse no servisu nian.

“Buat hotu bazeia ba ita nia lei kódigu penal nian hatete hosi juiz sira katak ema xefe suku ida sala mak sira foin haree mais kuandu seidauk ne’e sei nafatin kontinua prosesu ne’ebé iha,”nia esplika.

Nia katak, tuir planu xefe suku eleitu sira ba 2016 nian sei simu posse iha inísiu fulan Dezembru nian iha munisípiu 12 inklui RAEOA, depois de ida ne’e sira mós sei hetan formasaun, maibé karik mosu reklamasaun ruma kona-ba xefe suku sira mak sira MAE sei haree. (rio/cao)

Similar Post You May Like

Recent Post

Banner

Online Hits

  • Online: 8 / 516 Hits: 3819 / 714951
  •